Daghang Kristiyano ang makalitan kung muingon ko nga ang “kaluwasan” wala pa sa mga “naluwas”. Ang uban mangasuko sa akong gisulti apan akong tindugan nga ang akong gipulong kay kamatuoran man. Ang akong gisulti dili ni akoa kundili gikan ni sa biblia ug maoy konklusyon sa tulo ka mga bersikolo – Romans 13:11, 1 Peter 1:5 ug 2 Timothy 2:10.

Roma 13:11 (ABCEB)
Ug gawas pa niini, kamo nahibalo sa takna, nga panahon na alang kaninyo sa pagmata gikan sa pagkatulog kay karon duol na kanato ang kaluwasan kay sa dihang mituo kita.

1 Pedro 1:5 (ABCEB)
nga mga gibantayan sa gahom sa Dios pinaagi sa pagtuo alang sa kaluwasan nga andam aron ipadayag unya sa kataposang panahon.

2 Timoteo 2:10 (ABCEB)
Busa akong giantos ang tanang butang tungod ug alang sa mga pinili, aron sila usab makabaton sa kaluwasan diha kang Cristo Jesus uban sa himayang dayon.

Igbasa nato sa Romans 13:11, makit-an nato nga si Pablo naghuwat pa gihapon sa nagkaduol nga kaluwasan bisag dugay na siyang gatuo. Sa 1 Peter 1:5, si Pedro nagaingon nga ang kaluwasan ipadayag  kanato diha pa sa kataposang panahon. Ug diri sa 2 Timothy 2:10, mabasa nato nga nagpadayon sa pagpaninguha si Pablo nga ang mga pinili, katong gituohan nato na mga luwas, magkaduna ug kaluwasan. Dako kini nga kahibulongan kay ang mga apostoles nga si Pablo ug Pedro, bisag mga luwas na sila, nagpaabot pa gihapon sa kaluwasan.

Ang uban dili makadawat niini. Apan tinuod kini nga wala pa ang kaluwasan sa mga naluwas. Sa klarong pagkasulti ug ang hinungdan ngano wala pa nato ang kaluwasan — kay ato pa diay kining angkonon (Hebrews 1:14). Aduna kitay katungod maangkon kini kay nahimo naman ta ug mga manununod o bininlan sa Dios (Galatians 4:7). Gitawag ta mga manununod, kay tungod sa pagtuo, nahimo ta ug mga anak sa Dios (Galatians 3:26). Pero bisan ug naluwas kita tungod sa grasya (Ephesians 2:5, Ephesians 2:8), ang kaluwasan nagpabilin sa umaabot (Romans 13:11, 1 Peter 1:5, Hebrews 1:14). Ang kaluwasan usa kini nga panalundon, ug kita nga mga bininlan niini, nakatag-iya sa kaluwasan apan wala pa makaangkon niini.

Hebreohanon 1:14 (ABCEB)
Dili ba silang tanan mga alagad nga espiritu, nga gipadala aron sa pag-alagad, tungod ug alang kanila nga makaangkon sa kaluwasan?

Galacia 4:7 (ABCEB)
Busa pinaagi sa Dios dili na ikaw ulipon kondili anak, ug kon anak man, manununod usab.

Galacia 3:26 (ABCEB)
ay diha kang Cristo Jesus kamong tanan nahimo na man nga mga anak sa Dios pinaagi sa pagtuo.

Efeso 2:5 (ABCEB)
bisan sa dihang patay pa kita tungod sa atong mga kasal-anan, naghimo kanato nga buhi uban kang Cristo. Tungod sa grasya giluwas kamo.

Efeso 2:8 (ABCEB)
Kay tungod sa grasya kamo nangaluwas pinaagi sa pagtuo ug kini dili gikan kaninyo, kini gasa sa Dios

Mga Griyego nga pinulongan nga atong tun-an:

• sozo = luwas (pagsalbar o pagpanalipod; pagluwas gikan sa katalagman o kagub-anan)
• soterio = kaluwasan (kahilwasan; ang pagtubos gikan sa pagpangdaot sa mga kaaway)

Niari si Jesus para tubson ta sa kangitngit (John 12:46). Niari si Jesus para luwason (sozo) kitang tanan (John 12:47). Apan ang kaluwasan (soterio) ipadayag pa didto sa kataposang panahon. Kini ang panahon nga mawagtang na ang pagpangdaot sa kaaway. Mao na kini ang kaluwasan (soterio) ug nahulagway kini sa 2 Peter 3:13 nga bag-o na ang kalangitan ug ang yuta ug diin magpuyo ang pagkamatarong.

Juan 12:46 (ABCEB)
Ako mianhi sa kalibotan ingon nga kahayag aron ang tanan nga motuo kanako dili na magpabilin sa kangitngit.

Juan 12:47 (ABCEB)
Si bisan kinsa nga mamati sa akong mga pulong ug dili magtuman niini, ako dili maghukom kaniya kay ako wala man moanhi aron sa paghukom sa kalibotan, kondili aron sa pagluwas sa kalibotan.

2 Pedro 3:13 (ABCEB)
Apan sumala sa iyang saad, kita nagpaabot sa bag-ong kalangitan ug usa ka bag-ong yuta diin magpuyo ang pagkamatarong.

Dako nga katingad-an nga bisan naluwas kita tungod sa grasya ug dili tungod sa atong mga lihok (Ephesians 2:5, Ephesians 2:8-9) nga ang kaluwasan nagkinahanglan ug lihok – nga manglimbasog kita para maangkon kini (Philippians 2:12), nga maninguha kita nga magpadayon sa pagbaton niini (Philippians 3:12), nga mudagan kita nga adunay pagpugong sa kaugalingon para madaug kini (1 Corinthians 9:24-25).

Filipos 2:12 (ABCEB)
Busa, akong mga hinigugma, ingon nga kamo sa kanunay mituman, dili lamang sa panahon nga anaa ako kaninyo, kondili labaw pa gani sa panahon usab nga wala ako diha kaninyo, panglimbasogi ninyo ang inyong kaugalingong kaluwasan uban ang kahadlok ug pagkurog,

Filipos 3:12 (ABCEB)
Dili ingon nga ako nakabaton na niini o nahingpit na kondili nagpadayon ako aron ako makabaton, kay naiya na man ako ni Cristo Jesus.

1 Corinto 9:24-15 (ABCEB)
24 Wala ba kamo masayod nga sa usa ka lumba ang tanang apil sa lumba modagan, apan usa ra ang makadawat sa ganti? Busa dagan aron kamo makadawat sa ganti.
25 Ang matag magdudula naningkamot sa pagpugong sa iyang kaugalingon sa tanang mga butang. Sila naghimo gayod niini aron makadawat ug korona nga madunot ra, apan kita sa dili madunot.

Efeso 2:8-9 (ABCEB)
8 Kay tungod sa grasya kamo nangaluwas pinaagi sa pagtuo ug kini dili gikan kaninyo, kini gasa sa Dios—
9 dili tungod sa mga binuhatan aron walay bisan kinsa nga magpasigarbo.

Kung gamiton nato ang pagtandi ni Pablo gamit ang lumbaanay, ang premyo sa panag-indigay mao ang kaluwasan (1 Corinthians 9:24-25). Ang mga luwas maoy mga kasangka nga nalista sa lumbaanay, kay ang mga luwas nailista man sab sa libro sa kinabuhi (Luke 10:20; Philippians 4:3). Kung basahon nato ang Hebrews 12:1, gitawag ang mga magtutuo nga maoy nagdagan sa lumba. Sa laing pagkasulti, ang mga luwas ra ang apil sa lumba.

Lucas 10:20 (ABCEB)
Apan ayaw kamo paglipay niini nga ang mga espiritu mipatuo kaninyo, ikalipay hinuon ninyo nga ang inyong mga ngalan nasulat sa kalangitan.”

Filipos 4:3 (ABCEB)
Naghangyo usab ako kaninyo akong matuod nga kaubang magbubuhat, tabangi ang maong mga babaye nga naghago uban kanako diha sa Maayong Balita uban kang Clemente ug sa uban nakong mga kaubang magbubuhat nga ang mga ngalan anaa sa basahon sa kinabuhi.

Hebreohanon 12:1 (ABCEB)
Busa kay gilibotan man kita sa ingon ka baga nga panganod sa mga saksi, sinalikway ang tanang pagkamalahutayon ug ang sala nga daling mobalikos kanato, managan kita uban sa lahutay sa lumba nga gibutang sa atong atubangan,

Ang pagdagan sa lumbaanay nagkinahanglan ug paglahutay (Hebrews 12:1). Ang kato rang makalahutay maoy makadaug sa premyo nga purongpurong sa kinabuhi (James 1:12). Kinahanglan gayod ta mulahutay sa mga pagsulay aron dili mapapas ang atong pangalan sa libro sa kinabuhi (Revelation 3:5). Kung maluya ta o magpadaog ta sa sala, mapapas gayod ang atong pangalan (Exodus 32:33, Revelation 3:5).

Santiago 1:12 (ABCEB)
Bulahan ang tawo nga milahutay sa mga pagsulay kay human siya makaantos sa pagsulay, iyang madawat ang purongpurong sa kinabuhi nga gisaad sa Dios ngadto sa mga nahigugma kaniya.

Pinadayag 3:5 (ABCEB)
Ang magmadaogon sul-oban ug mga bisti nga puti, ug ang iyang ngalan dili nako papason gikan sa basahon sa kinabuhi, hinuon akong ipahayag ang iyang ngalan sa atubangan sa akong Amahan ug sa atubangan sa iyang mga anghel.

Exodo 32:33 (ABCEB)
Apan ang Ginoo miingon kang Moises, “Si bisan kinsa nga nakasala batok kanako, siya papason nako gikan sa akong basahon.

Gihulagaway ang paglahutay na pagtuman sa kasugoan sa Dios ug sa pagtuo kang Jesus. (Revelation 14:12). Ug ang paglahutay mugawas ra kung aduna tay pag-antos (Romans 5:3). Kung magpadayon ta sa atong pagtuo (1 Peter 1:7), makabaton ta ug kaluwasan (1 Peter 1:9). Pero bisan ang pagtuo maoy makatabang nato sa pagbantog sa kalibutan (1 John 5:4), dili ta angay makampante kay ang pagtuo matay-og man (1 Corinthians 16:13, 1 Peter 5:9). Kung dili pa matay-og, wala unta magpasidaan si Pablo ug Pedro nga lig-onon ang atong pagtuo.

Pinadayag 14:12 (ABCEB)
Mao kini ang paglahutay sa mga balaan, sa mga nagtuman sa kasugoan sa Dios ug sa pagtuo kang Jesus.

Roma 5:3 (ABCEB)
Labaw pa niini, nagmalipayon kita bisan sa atong mga kasakit, kay nasayod man kita nga ang pag-antos mobunga ug pagkamalahutayon,

1 Pedro 1:7 (ABCEB)
aron nga ang pagkatinuod sa inyong pagtuo, nga labaw pa ka bililhon kay sa bulawan nga madugta nga sulayan pinaagi ug kalayo, mosangpot ngadto sa pagdayeg ug paghimaya ug pagpasidungog inigpadayag unya kang Jesu-Cristo.

1 Pedro 1:9 (ABCEB)
Ingon nga sangpotanan sa inyong pagsalig, kamo nakabaton sa kaluwasan sa inyong mga kalag.

1 Juan 5:4 (ABCEB)
Kay ang tanan nga maggikan sa Dios magbuntog sa kalibotan ug ang pagdaog nga nagbuntog sa kalibotan mao kini, ang atong pagtuo.

1 Corinto 16:13 (ABCEB)
Pagtukaw kamo, barog kamo diha sa pagtuo, pagpakalalaki kamo, pagmakusganon.

1 Pedro 5:9 (ABCEB)
Sukol kamo kaniya ingon nga kamo lig-on sa inyong pagtuo, sa nahibaloan ninyo nga ang samang mga pag-antos kinahanglan gayod masinati ninyong tanan nga kaigsoonan nga ania sa kalibotan.

Angay natong lig-onon ang atong pagtuo pinaagi sa pagtuon sa pulong sa Dios (Romans 10:17, Psalms 1:2-3). Kung maluya ang atong pagtuo, manibog ta ug mangalaglag (Hebrews 10:39), o mahimo tang tughaw ug iluwa ta ni Cristo gikan sa iyang baba (Revelation 3:16). Kung mukuyos ang atong pagtuo ug kita mangatras, dili na malipay ang Ginoo kanato (Hebrews 10:38). Ang dili mulahutay sigurado nga dili maluwas (Matthew 24:13, Mark 13:13).

Roma 10:17 (ABCEB)
Busa ang pagtuo naggikan sa pagpamati ug ang pagpamati pinaagi sa pulong ni Cristo.

Salmo 1:2-3 (ABCEB)
2 hinuon ang iyang kalipay anaa sa Balaod sa Ginoo, ug sa Balaod niya namalandong siya adlaw ug gabii.
3 Siya sama sa kahoy nga gitanom daplin sa kasapaan sa tubig, nga naghatag sa iyang bunga sa iyang panahon, ug ang iyang dahon dili malaya. Sa tanan niyang gibuhat siya nagmauswagon.

Hebreohanon 10:39 (ABCEB)
Apan dili kita uban sa mga nanibog ug nangalaglag, kondili uban sa mga may pagtuo ngadto sa pagluwas sa ilang mga kalag.

Pinadayag 3:16 (ABCEB)
Ug kay ikaw dagaang man lamang, dili bugnaw ug dili usab init, iluwa ko ikaw gikan sa akong baba.

Hebreohanon 10:38 (ABCEB)
apan ang akong tawo nga matarong magkinabuhi pinaagi sa pagtuo, ug kon siya mosibog man, kaniya walay kalipay ang akong kalag.”

Mateo 24:13 (ABCEB)
Apan ang molahutay hangtod sa kataposan maluwas.

Marcos 13:13 (ABCEB)
Unya dumtan kamo sa tanan tungod sa akong ngalan, apan ang molahutay hangtod sa kataposan maluwas.

Para maluya ang atong pagtuo ug dili ta makalahutay, paningkamutan nga makuha ni Satanas ang pulong sa Dios gikan sa atong mga kasingkasing (Luke 8:11) kay ang pulong sa Dios maoy nagaresulta sa pagtuo (Romans 10:17). Kung magpadayon ta sa atong pagtuo ug kita mulahutay o mag-antos (1 John 5:4), magahari ta kuyog ni Jesus (2 Timothy 2:12). Pero katong dunay pagtuo pero dili mulahutay (mga walay buhat), dili sila angay makig-uban kang Cristo (James 2:24). Angay unta kita musunod ni Cristo (1 Corinthians 11:1) nga nipasiugda sa pagtuo ug nihingpit niini pinaagi sa paglahutay o pag-antos (Hebrews 12:2).

Lucas 8:11 (ABCEB)
Karon ang sambingay mao kini: Ang binhi mao ang pulong sa Dios.

2 Timoteo 2:12 (ABCEB)
kon kita mag-antos, maghari usab unya kita uban kaniya. Kon kita dili moangkon kaniya, dili usab kita niya angkonon,

Santiago 2:24 (ABCEB)
Nakita ninyo nga ang tawo gihimong matarong pinaagi sa iyang binuhatan ug dili pinaagi sa pagtuo lamang.

1 Corinto 11:1 (ABCEB)
Sundog kamo kanako, ingon nga ako nagsundog kang Cristo.

Hebreohanon 12:2 (ABCEB)
nga magtutok kang Jesus, ang nagpasiugda ug ang mohingpit sa atong pagtuo. Tungod sa kalipay nga gibutang sa iyang atubangan, giantos niya ang krus sa walay pagsapayan sa kaulaw niini ug karon naglingkod siya diha sa tuo sa trono sa Dios.

Kitang tanan makasasa (Romans 3:23). Kitang tanan mga ulipon sa sala (John 8:34) ug ilalom sa balaod (1 Corinthians 15:56). Apan gipadala sa Dios si Jesus para luwason ta sa balaod ug sagopon ta ingon nga mga anak sa Dios (Galatians 4:4-5). Kay nahimo naman tag mga anak sa Dios, aduna na tay panalundon (Galatians 4:7). Ug gihatag sa Dios ang Espirtu Santo kanato nga maoy pasalig sa atong panalundon (Ephesians 1:13-14).

Roma 3:23 (ABCEB)
nakasala ang tanan ug nawad-an sa himaya sa Dios.

Juan 8:34 (ABCEB)
Si Jesus mitubag kanila, “Sa pagkatinuod gayod, sultihan ko kamo nga ang tanan nga magpakasala ulipon sa sala.

1 Corinto 15:56 (ABCEB)
Ang kalala sa kamatayon mao ang sala ug ang gahom sa sala mao ang balaod.

Galacia 4:4-5 (ABCEB)
4 Apan sa pag-abot na sa tukma nga panahon, ang Dios mipadala sa iyang Anak nga natawo pinaagi sa usa ka babaye, natawo ilalom sa Balaod,
5 aron pagtubos sa mga nailalom sa Balaod, aron atong madawat ang pagkasinagop ingon nga mga anak.

Efeso 1:13-14 (ABCEB)
13 Pinaagi kaniya kamo usab, sa inyong pagkadungog sa pulong sa kamatuoran, sa Maayong Balita mahitungod sa inyong kaluwasan ug sa inyong pagtuo diha kaniya, gipatikan pinaagi sa gisaad nga Espiritu Santo.
14 Siya mao ang pasalig sa atong panulundon hangtod nga makapanag-iya na kita niini, alang sa pagdayeg sa himaya sa Dios.

Unsa man ang atong panalundon? Gawas sa kaluwasan (Hebrews 1:14), adunay pipila ka mga bersikolo nga nagpagkita kung unsa pa ang atong mga dawaton:

1. Gingharian sa Dios (1 Corinthians 6:9-10, Matthew 25:34)
2. Kinabuhing dayon (Matthew 19:29)
3. Ang kalibutan o yuta (Matthew 5:5)
4. Ang bag-ong Jerusalem (Revelation 21:2,7)

Kaning upat nga panalundon kay mga saad nga maangkon sa umaabot. Ug kay ang kaluwasan maangkon man sa umaabot, kaning upat nga panalundon nahulog nga mga hulagway sa kaluwasan.

1 Corinto 6:9-10 (ABCEB)
9 Wala ba kamo masayod nga ang mga tawong dili matarong dili makapanunod sa gingharian sa Dios? Ayaw kamo pagpalimbong; walay mga makihilawason o mga tigsimba ug mga diosdios o mga mananapaw o mga makig-unay ug isigkalalaki
10 o mga kawatan o mga hakog o mga palahubog o mga tigpasipala o mga tulisan nga makapanunod sa gingharian sa Dios.

Mateo 19:29 (ABCEB)
Ug ang tanan nga nagbiya sa mga balay o mga igsoong lalaki o mga igsoong babaye o amahan o inahan o mga anak o kayutaan tungod sa akong ngalan, makadawat ug usa ka gatos ka pilo, ug makapanunod sa kinabuhing dayon.

Mateo 5:5 (ABCEB)
“Bulahan ang mga maaghop kay maila ang yuta.

Pinadayag 21:2 (ABCEB)
Ug nakita nako ang balaang siyudad, ang bag-ong Jerusalem, nga nanaog gikan sa langit gikan sa Dios, inandam sama sa usa ka pangasaw-onon nga gidayandayanan alang sa iyang pamanhonon.

Pinadayag 21:7 (ABCEB)
Ang magmadaogon makapanunod niini ug ako mahimo nga iyang Dios ug siya mahimo nga akong anak.